လေယာဉ်ခရီးစဥ်တစ်ခုစီးရတော့မယ့်အခါသတိထားသင့်တဲ့အရေးကြီးတဲ့အချက်တစ်ခုကတော့ Baggage Allowance ပဲဖြစ်ပါတယ်။ မိမိစီးမယ့်လေကြောင်းလိုင်းပေါ်မူတည်ပြီးလေယာဥ်ပေါ်သယ်ဆောင်ခွင့်ရှိတဲ့အိတ်အရေအတွက်၊ အလေးချိန်၊ အရွယ်အစားနဲ့ သယ်ဆောင်နိုင်တဲ့ပစ္စည်းအမျိုးအစား၊ စည်းကမ်းချက်များစသဖြင့်ကွာခြားမှုရှိပါတယ်။ ဒီလိုမိမိစီးမယ့်လေကြောင်းလိုင်းရဲ့ Baggage Allowance နဲ့စည်းကမ်းချက်တွေကိုမသိရှိထားဘူးဆိုရင်တော့မလိုအပ်ပဲအပိုအခကြေးငွေတွေပေးရတတ်ပြီး၊ လေယာဥ်စီးရမယ့် Process ကိုလဲကြန့်ကြာနှောင့်နှေးစေနိုင်ပါတယ်။ ဒါကြောင့်ဒီဆောင်းပါးမှာလေယာဉ်စီးတဲ့အခါသိထားသင့်တဲ့ Baggage Allowance အကြောင်းကိုရှင်းပြသွားမှာပဲဖြစ်ပါတယ်။

Baggage Allowance ဆိုတာဘာလဲ?

Baggage Allowance ဆိုတာခရီးသယ်တစ်ဦးအတွက်ခွင့်ပြုပေးထားတဲ့လေယာဥ်ပေါ်သယ်ဆောင်နိုင်တဲ့အိတ်အလုံးအရေအတွက်၊ အရွယ်အစားနဲ့အလေးချိန်သတ်မှတ်ချက်ကိုရည်ညွန်းတာဖြစ်ပါတယ်။ အများအားဖြင့်လေယာဥ်ပေါ်သယ်ဆောင်နိုင်တဲ့အိတ်ကိုနှစ်မျိုးခွဲထားပါတယ်။

1. Checked Baggage → လေယာဉ်ဝမ်းဗိုက်ထဲတွင်းသယ်ဆောင်သွားမယ့်အိတ်

2. Carry-On / Hand Carry → ခရီးသည်တစ်ဦးနဲ့အတူလေယာဉ်အတွင်းသယ်ဆောင်သွားနိုင်တဲ့အိတ်

Checked Baggage (လေယာဥ်ဝမ်းဗိုက်တွင်းသယ်ဆောင်သွားမည့်အိတ်)

• ပုံမှန်သယ်ဆောင်ခွင့် - ၁၀ မှ ၃၀ ကီလိုဂရမ်အထိသယ်ဆောင်နိုင်ပါတယ် (မိမိစီးမယ့်လေကြောင်းလိုင်းအလိုက်ကွဲပြားမှုရှိပါတယ်)

• သယ်ဆောင်ပုံ - လေယာဥ်စီးဖို့ Check-in ဝင်တဲ့အခါ Checked Baggage အနေနဲ့ Check-in Counter မှာထားခဲ့ရပါပြီး၊ လေယာဥ်ဆင်းသက်တဲ့အခါပြန်လည်ရယူနိုင်ပါတယ်။ လေယာဉ်ဝမ်းဗိုက်ထဲမှာသယ်ဆောင်သွားမှာဖြစ်တဲ့အတွက်ခရီးစဉ်အတွင်းမသုံးနိုင်ပါ။

ထည့်သွားနိုင်သောပစ္စည်းများ – အဝတ်အစား၊ ဖိနပ်၊ စာအုပ်၊ သေချာစွာထုပ်ပိုးထားသောအစားအစာစသဖြင့်

မထည့်သွားသင့်သောပစ္စည်းများ – ငွေကြေးနှင့်တန်ဖိုးကြီးပစ္စည်းများ၊ လျှပ်စစ်ပစ္စည်းများ (Laptop, ဖုန်း၊ ဘက်ထရီများ)၊ မီးခြစ်စသဖြင့်ပေါက်ကွဲနိုင်သောပစ္စည်းများ

Hand Carry / Cabin Baggage (လေယာဥ်ပေါ်သယ်ဆောင်သွားနိုင်သောလက်ဆောင်အိတ်)

• ပုံမှန်သယ်ဆောင်ခွင့် - ၇ မှ ၁၀ ကီလိုဂရမ်ခန့်

• အရွယ်အစား - အများအားဖြင့် 55cm × 40cm × 20cm အတွင်းရှိသောလက်ဆောင်အိတ်

• သယ်ဆောင်ပုံ - လေယာဉ်ထိုင်ခုံအပေါ်ကအိတ်ထည့်ခန်း (Overhead bin) သို့မဟုတ်မိမိရဲ့ထိုင်ခုံအောက်မှာထားနိုင်ပါတယ်။

ထည့်သွားနိုင်သောပစ္စည်းများ

• Passport, ငွေကြေးနှင့်တန်ဖိုးကြီးပစ္စည်းများ

• Laptop, ဖုန်း, Charger

• အရေးကြီးစာရွက်စာတမ်းများ

• အရည်ပစ္စည်းများ (100ml အောက်သာသယ်ဆောင်ခွင့်ရှိပါမယ်)

• ဆေးဝါးများ

မထည့်သွားသင့်သောပစ္စည်းများ 

• ဓားနှင့်အချွန်အတက်ပါသောပစ္စည်းများ

• 100ml ထက်ကျော်သောအရည်ပစ္စည်းများ (အချိုရည်၊ ရေမွေးစသဖြင့်)

• မီးလောင်နိုင်သောပစ္စည်းများ

Connect Myanmar မှအကြံပြုချက်

• လေယာဥ်ခရီးမစတင်ခင်မိမိစီးရမယ့်လေကြောင်းလိုင်းရဲ့ Baggage Allowance စည်းမျဉ်းတွေကိုသေချာစစ်ဆေးပါ

• အိတ်အလေးချိန်ကိုကြိုတင်တိုင်းတာထားပြီး၊ သတ်မှတ်ချက်ထက်ကျော်လွန်မှုရှိမရှိစစ်ဆေးပါ

• ဖုန်းပါဝါဘဏ်၊ ငွေကြေးနှင့်တန်ဖိုးကြီးပစ္စည်းများ၊ Laptop  စသဖြင့် Battery ပါဝင်သည့်လျှပ်စစ်ပစ္စည်းများကို Hand Carry လက်ဆောင်အိတ်ထဲသာအမြဲသယ်ဆောင်ပါ

• အိတ်တွေမှာမိမိရဲ့နာမည်နဲ့ ဆက်သွယ်ရမယ့်ဖုန်းနံပါတ်ကိုတွဲထားပေးပါ